23年前嘅10月忽然收到罗记罗文离世嘅消息，内心忐忑。当时心里面将几十年同佢相交，相知，相识嘅一切片段喺脑海不停咁重播又重播。食嘢都食唔落去，身体最诚实。我出去逛一逛，走到九龙通利琴行买咗两支木吉他，买咗啲食物，走回录音室就随手开始弹咗啲罗文嘅歌。 罗记嘅歌:有好多都系我细个时我跟师傅顾嘉辉嘅时候一齐做编曲嘅，亦有一啲我读紧中学时候好喜欢罗文嘅歌曲，例如"前程锦绣"，我开始弹弹弹，当时只想怀缅，忆录一下，亦冇任何目的同计划去做任何事。 跟住揿个录音机嘅掣，攞支吉他就开始录音。连续差唔多三日冇离开过录音室，接近72小时净系食我买嘅杯面干粮，饮录音室嘅蒸馏水。最终将14只歌吉他嘅部分全部弹晒，总算松一口气。 三日里面喺录音室凉都冇冲过，只系好攰嘅时候就休息一阵间，根本上加埋都瞓唔到几个钟，带住好疲累嘅身躯返屋企枕低晒一切，好好瞓一觉。 之后再返录音室做后期嘅工作，加钢琴，加一啲简单嘅声效，然后加完晒再混音。成件事搞咗差唔多半年，亦都系收咗喺我自己嘅柜筒里面。从来冇谂过要发行。呢只专辑，只不过系一个心愿，耐唔中攞出嚟听，夜晚瞓唔着，长夜难眠，无心睡眠，攞出嚟听下，即刻心底泛起一阵暖意，谂起好朋友亦都听番自己做过嘅嘢。 经过咗23年，我再重新揾个大师帮我master母带，今次正式将佢攞出嚟同大家分享14首歌。轻松冇压力。当时系冇谱冇任何其他（录音室用嘅拍子机，Click,乜都冇），就咁随手弹，听出嚟系更加冇边际，好舒服。啲鼓声系我自己轻轻咁拍个吉他，然后将佢重复驳起嚟用嚟扮鼓声。 所以罗文呢个专辑系最适宜大家静静休息嘅时候听，夜晚听又得，揸车嘅朋友都可以听，系一定唔会越揸越快嘅。希望大家喜欢一个咁温柔、温婉可爱嘅14首罗文纯音乐。好想大家听完之后再俾意见我（网上@微信或者小红书留言俾我）。谢谢大家！